Tag Archives | Springbok

SA Sport soos ‘n Sandkasteel!

By Rian Truter on June, Wednesday 19 2013 in 2013, Education, Life 4

En daar gebeur dit weer!

Ek bou weer ‘n keer my hoop op ‘n groen-en-goue sandkasteel! Weer bars my bubble soos ‘n oorwerkte Chappies in ‘n senuweeagtige openingskolwer se kake.

Ons Springbokke speel soos slaapwandelaars teen ‘n opponent wat nie eens in dieselfde asem as ons genoem behoort te word nie. Maar Heyneke hou voet by stuk die saak is nie so swak soos dit lyk nie. Ons span is nog jonk en hulle moet leer…

Ek verstaan hom nie mooi nie. Is rugby dan nie ‘n spel vir jongmanne nie? Ek sou sy verweer verstaan as die manne almal in hul veertigs was, maar te jonk? Miskien bedoel hy in ondervinding te jonk? Maar dit klop ook nie met die statistiek wat Naas en irriterende Ashwin op hul flatscreen wys nie.

Ek dink eerder daar waar Meyer se kop in die sand gedruk is, kan hy nie mooi die modder van die sandkorrels onderskei nie. Of miskien probeer hy vir Peter Div napraat, maar dit gaan hy nie sommer regkry nie! Peter kon ten minste praat!

Ons jongmanne – die 0.20’s – maak skande in Frankryk. Trek weg teen ‘n power VSA en almal dink die wêreldkampioene gaan hierdie jaar amok maak. Rom rom rom! Maar helaas. Weer vee die eerste beste ou brandertjie ons sandkasteel se fondasie onder hom uit. Nóg ‘n span chokers en ek huil saggies in my groen trui.

En dan die cherrie op die koek. Ons ware chokers, die Proteas kry dit weer reg om te wys hoe swak Suid-Afrikaanse sport nou regtig is. Hoeveel keer het ek nie gesê dat ek nou klaar is met hulle nie? En elke keer dwing my patriotisme en hoop my terug om nóg ‘n keer te kyk. Nóg ‘n keer te hoop. En om nóg ‘n keer met my hoop in flarde in my hande te sit.

Nóú is ek klaar.

Maar vir wie moet ek nou ondersteun? Die Bafana Bafana? Ons netbal of hokkie? Ek weet nie so mooi nie.

Maar miskien begin die nate al in ons skoolsport lostorring. Veral as ‘n pa ‘n skool vir R2 miljoen wil dagvaar omdat hulle nie sy seun as hul skool se eerste krieketspan se kaptein wil kies nie! En dan is die skool sommer ook nog rassiste op die koop toe. Verregaande, maar wat verwag jy as ons Minister van Nasionale Onderwys glo 30% is goed genoeg? As drie uit tien ‘n slaagsyfer is, dan is verloor seker nie te vrot nie!

O, ja. Amper vergeet ek van ons Minister van Sport. Fikile Mbalula wil miljoene spandeer om ‘n Oscaraand vir ons sportmanne en –vroue te hou. Ek wil weet vir wát en vir wie? Wie van hulle verdien meer as koue water en die sout van ‘n nasie se trane?

Of het dit iets met ons nasionale embleem te make? Verbeel ek my of verlep ‘n protea net makliker as wat ‘n springbok kan pronk?

Maar wie weet? Eendag wen ons vir Switzerland in kaasmaak.

Of gaan my hoop my hier ook beskaam?

Losers make promises they often break. Winners make commitments they always keep. – Dennis Waitley

Boom, crush. Night, losers. Winning, duh. – Charlie Sheen

We must accept finite disappointment, but never lose infinite hope. – Martin Luther King JR.

Debbie Thompson: Nie bang om voor te stap nie!

By Rian Truter on November, Thursday 1 2012 in 2012, Wine 0

Saam met Debbie op Simonsig

Boesmanland vat my hand …

Hoe gebeur dit dat ‘n meisie van Springbok as Suid-Afrika se vrouewynmaker van die jaar aangewys word?

Wyn is mos amper, net soos Engels, ’n vreemde besigheid daar tussen die gousblomme en amperse woestyn! Brits word net in ekstreme omstandighede, soos vir selfsverdediging, gepraat en wyn net by die nagmaal gebruik.

Maar soos met baie goed in Namakwaland, moet jy nie dat dit wat jy sien jou mislei nie. Wat vir jou soos sand lyk, is eintlik ’n swanger blomtuin en die matriekmeisie van die Hoërskool Namakwaland is een van Suid-Afrika se toekomstige wynmaaksterre.

Debbie Thompson (Burden) is ’n gebore en getoë Namakwalander. Nie so duidelik waarneembaar as jy na haar uitspraak luister nie, maar as jy tog mooi oplet, kan jy die Namakwalandse oorronding optel.

Sy het as kind op Oranjemund gebly en later op Springbok groot geword. Gematrikuleer aan die plaaslike hoërskool en deelgeneem aan netbal en alle ander aktiwiteite denkbaar gedoen.

Haar aanvanklike gedagte was om ’n veearts te word, maar omdat die keuring streng en die toelating min was, besluit sy om eers net vir B.Sc. by Universiteit Stellenbosch in te skryf. Dalk sal sy na haar eerste jaar aansoek doen vir Veeartsenykunde in Pretoria.

Gelukkig vir wyndrinkers reg oor die wêreld, en ongelukkig vir die diere, byt die wyngogga Debbie gedurende haar eerste maande op Stellenbosch. Na verskeie wynproeë verander sy haar kursus na B.Sc.Agric. met spesialisering in Wynkunde.

Sy voltooi die finale praktiese komponent van haar kursus op Hazendal onder toesig van Ronell Widd en word gedurende hierdie tyd vir ’n onderhoud op Simonsig Landgoed genooi. En later vir ’n tweede onderhoud. En Johan Malan sien raak dat hierdie student van Springbok die eerste vrouewynmaker van Simonsig kan word. Die res is geskiedenis.

Debbie vorm vandag, as rooiwynmaker, saam met Johan Malan as keldermeester en Hannes Meyer as witwynmaker Simonsig se formidabele span.

Volgens Debbie was haar eerste pars op Simonsig vir haar die ergste. Sy was ’n totale groentjie en boonop ’n vrou in ’n manswêreld. Sy was nie net in beheer van die pars nie, maar moes ook leiding gee en vir die ou hande wys dat sy voor kan stap.

Sy sê sy het baie gestres en baie gehuil. Maar met harde werk en tipiese Namakwalandse vasbyt, het sy die eerste toets geslaag.

Sedert daardie eerste pars het Debbie baie toekennings en eerbewyse ontvang. Tussen al die Veritas Dubbelgoud en die ABSA Top Tien-toekennings bly die aanwysing as Vrouewynmaker van die Jaar in 2005 vir haar die kosbaarste. Sy skryf haar toekennings toe aan harde werk, maar ook aan goeie spanwerk. Prestasies behaal jy nie op jou eie nie en sy praat met groot trots en deernis van die manne saam met haar in die kelder.

Sy is intussen getroud met, soos sy sê ’n Engelsman, Simon Thompson (ook in die wynbedryf) en is die ma van een. Die tweede gaan sy/haar opwagting tydens volgende jaar se pars maak.

Om Debbie beter te leer ken het ek haar die volgende vrae gevra:

• Waarom het jy ’n wynmaker geword?

Wynmaak is ’n proses waarin jy jou kreatiwiteit kan uitleef en ook jou persoonlike stempel kan afdruk. Dit kombineer die praktyk en teorie vir my. En ek kry die kans om soms buite te werk!

• Wat is die beste wyn wat jy ooit gemaak het?

Simonsig Redhill Pinotage 2003

• Wat is die beste wyn wat jy gedrink het?

Châteauneuf du Pape 1995

• As jy nie ’n wynmaker geword het nie, wat dan anders?

Veearts of dalk wildbewaarder.

• Wat is onafgehandel op jou bucket list?

Baie oorsese reise. Veral na Toskane in Italië. Die fliek Under the Tuscan Sun is een van my gunstelinge en dan Mauritius. Die laaste een moet saam met die hele familie en al die kinders wees.

• Troeteldier(e)

Honde. ’n Boerboel en Jack Russel.

• Gewildste TV-program

Brothers and Sisters en mag ek sê … 7^e Laan!

• Watter liedjie sing jy in die kelder/stort/kar?

AC/DC – You shook me all night long. Dit was die instapliedjie op ons troue.

• Jou lewensmotto?

Aanhouer wen!

• Wat dink jy van bokswyn?

Daar is beslis ‘n plek vir bokswyn; so lank die mense net wyn drink! Ek is baie gekant teen die snobisme wat met wyn gepaard kan gaan. Ons kan te ernstig raak oor wyn.

• Watter wyn drink jy as jy nie jou eie drink nie?

Oldenburg Vineyards se Cabernet Sauvignon of Cabernet Franc.

• In watter kultivar het Jesus die water by die troue in die Nuwe Testament verander?

Pinot Noir. Dit is ’n moeilike kultivar om goeie wyn van te maak.

• Tent of Hotel?

Hotel

• Hoe ontspan jy?

Draf. Ek draf elke dag in my etensuur so 5 kilometer. Dit maak my kop oop en ek kom buite.

In die proeglas: Simonsig Redhill Pinotage 2009

Analysis: Provided by Simonsig

Alcohol: 15% vol

Residual Sugar: 2.1 g/l

Total Acidity: 6.05 g/l

Ph: 3.34

Style: Full bodied wood matured Pinotage from a specific vineyard site.

Wine Description: Dense opaque colour. A tapestry of dark luscious fruit. Effortless expression of intense notes of plum and mulberry. A thread of cinnamon spice and vanilla pod adds dimension to this tapestry. Tightly knitted yet smooth tannins sculpture a lingering palate of fruit filled delicacies.

Wood Maturation: 17 months oaking.

Serving Suggestions: Cape Malay bobotie, seared tuna, slow roasted belly of pork, oven roasted rack of lamb, crispy duck salad with hazelnut praline.

www.simonsig.co.za

021 888 4932

The real Antichrist is he who turns the wine of an original idea into the water of mediocrity. – Eric Hoffer

Life is too short, and I’m Italian. I’d much rather eat pasta and drink wine than be a size 0. – Sophia Bush

Always carry a corkscrew and the wine shall provide itself. – Basil Bunting

Simonsig Landgoed se imposante ingang

Restaurant en proelokaal

Daar is beslis genoeg wyn!

Studie in nuwehout

Simonsig laat die Kaap vonkel!

My kosbaarste besitting

By Rian Truter on May, Thursday 17 2012 in 2012, Education, Presentations 12

Vir vyftien maande van my lewe het ek die voorreg gehad om in Springbok te kon bly. As skoolhoof van die Hoërskool Namakwaland, of soos almal dit in daardie geweste ken en noem, HSN.

Vir diegene wat nie weet waar Springbok is nie, kan ek net sê dit is een van die groot stede in Namakwaland.

En vir stadsjapies soos ek, is Namakwaland ’n ander land. Jy moet na regte eintlik ‘n visum daarvoor hê, want dis soos die bekende reisspreuk sê: you go to another country to find they do things differently there.

Nie te min, die aanpassing was nie altyd maklik nie en menige dag het ek my besluit om die Kaap te verlaat, ernstig betwyfel. Tot op een goeie pragtige Namakwalandse môre …

Op dié spesifieke oggend, ek kan nie meer onthou watter dag van die week dit was nie, het ek seker drie keer verby ’n vrou gestap wat in die voorportaal voor my kantoor gewag het. Ek was onder die indruk sy het ’n afspraak met iemand anders, maar later vra ek tog of ek haar kan help?

Sy sê toe sy is op soek na die skoolhoof.

In die kantoor wou ek weet hoe ek haar kon help? Voor my het ’n vrou met ’n kopdoek oor haar hare gesit. Haar gesig gebeitel deur die fel Namakwalandse son en weer. Maar met ’n trots van iemand wat nie twyfel oor wie sy is nie.

Sy wou hoor of ek nie haar dogter by HSN sal inskryf nie.

My onmiddellike reaksie was dat die skool en koshuis vol is en dat sy aan die begin van die nuwe skooljaar weer moet probeer. Dit was in die middel van die kwartaal en die skool en koshuis was tot kapasiteit toe beset.

Maar ek wou meer uitvind van hierdie vrou, want miskien is sy onwetend een van die rykste mense in die omgewing en ek wys haar uit onkunde weg. Wie weet, dalk wil sy ’n swembad vir HSN bou? Ek kon al die Rian Truter Swembad se blou water sien!

Ek wou weet van waar kom sy? Van Garies.

Wat doen sy? Sy werk as skoonmaker in die skoolkoshuis op Garies.

Hoe het sy dan op Springbok gekom? Sy het ’n geleentheid agter op een of ander boer se bakkie gekry.

Nou was my visoen van ’n moontlike swembad in skerwe en saam daarmee was HSN finaal vol!

Die skoolhoof in my het ingeskop. Sy moet daarvan vergeet om haar dogter by HSN in te skryf, want behalwe dat ons vol is, kon sy vir baie goedkoper haar kind op Garies laat skoolgaan.

Asseblief meneer, vra sy. Asseblief meneer, ek het tydens die blommetyd by die hotel op Kammieskroon gaan werk en die blommekykers se klere gewas om ekstra geld te verdien. Ek het vir Grietjie (kan tot my skande nie meer die kind se naam onthou nie!)’n onderokiekie en ’n seepiekie gekoop. Asseblief, meneer!

Ek het volgehou dat die skool vol was en opgestaan. Toe ek my hand uitsteek om haar te groet, gryp sy my hand met altwee haar hande vas.

Asseblief, meneer…

Maar mevrou ek het mos gesê die skool is vol en in elk geval is dit beter vir jou en Grietjie dat sy sommer daar by jou skoolgaan.

En net toe ek besig was om my finaal van hierdie vrou se hande los te wikkel, los sy skielik my hand en buig na my toe oor die lessenaar en kyk my met trane in haar oë aan en sê in ’n fluisterstem:

Asseblief, meneer. Meneer, ek bring vandag vir jou my kosbaarste besitting …

Dit was op daardie oomblik dat die Here my klap en vir my sê: Dit is waarom Ek jou Springbok toe gestuur het. Om net weer te besef dat jy elke dag met iemand se kosbaarste besitting werk.

Baie dae vergeet ons as onderwysers dat ons elke dag met mense se kosbaarste besittings werk. Ons hou kermisse en samel verwoed geld in vir die skool en reël selfs dat die bank die geld op ’n Saterdagmiddag vir veilige bewaring sal kom haal.

Maar elke dag sit daar miljoene rande se kosbaarste besittings in ’n klas en so maklik sê ons jou luiaard, sleg, skollie of onnosel.

Ongelukkig is dit ook waar dat ouers van hul kosbaarste besitting vergeet. Hulle raak so besig met ander dinge wat veel minder werd is as hul kinders en skrik soms te laat wakker as hierdie kosbaarste besitting amper deur hul vingers geglip het.

Of HSN vol gebly het?

Nee, skielik was ons nie meer so vol dat ek nie nog een kosbare besitting kon akkommodeer nie.

We are always too busy for our children; we never give them the time or interest they deserve. We lavish gifts upon them; but the most precious gift, our personal association, which means so much to them, we give grudgingly. – Mark Twain

Throughout life one does not miss any chance to hold onto the things that are really precious. If one is truly wise. – Ed Greenwood

Die ma se hart is haar kind se klaskamer. – Henry Ward Beecher

For he’s a jolly good Fellow!

By Rian Truter on September, Thursday 8 2011 in 2011, Education, Leadership, Life 4

Ons bloed is Groen! Hier kom die Bokke!

Dit lyk my ons Minister van Sport, die agbare Fikile Mbalula, het ook Dale Carnegie se boek How to win friends and influence people gelees?

Klaarblyklik het daar sedert ek die boek gelees het ‘n hoofstuk bygekom. Naamlik: Hoe om in Afrikaans te vloek en vriende te maak.

Dat Afrikaans ‘n kragtige taal is, dit weet almal van ons wat dit van kindsbeen praat. En dat daar seker min tale in die wêreld is wat by Afrikaans kan kers vashou as dit by vloekwoorde kom!

Die heer Fikile het dit ook seker gesnap, want waarom anders sal hy ons Springbokke opdrag gee om hulle te moer? En hulle te bliksem?

Miskien wou hy hulle met Kill the Kiwi aanhits, maar het hom bedink en gedog die plakaat wat hy in die skare sien, was deel van sy toespraak. Of dalk het die jolige atmosfeer hom terug geneem na sy dae as ANC Jeugliga-voorsitter. Dit was nou voor onse Julius M.

Die skare was egter in hulle noppies, want hier praat die agbare minister, wat meegehelp het dat hulle geliefde bok nou ‘n laaste staanplek op die trui se mou gekry het, húlle taal. En boonop sterk woorde. Woorde wat hulle verstaan. For he’s a jolly good fellow …

Ek dink arme Bakkies Botha was totaal verward. Wat moet hy nou doen? Hulle bliksem of uitlos?

Ek hoop Minister Fikile gaan opdraf as ons manne sy opdrag letterlik opneem en ons met 13 man moet speel. Want dit wil lyk dat as hy praat, luister hulle.

Die minister moes dieselfde woordeskat tydens personeelsessies gebruik het, want na die SA Sporttoekennings in Sun City vanjaar, het sy personeel blykbaar ‘n hotelkamer wat R60 000 per nag kos se versiering eiehandig verander. Maar hulle sê dis kwaadwillige liegstories.

Ek hoop dit was Minister Mbalula se laaste spanpraatjie aan enige sportspan – behalwe aan ons boksers. Hulle het dit nodig, want hulle word gewoonlik net gemoer.

Ek wil aanbeveel dat die minister die betrokke hoofstuk weer, maar met meer aandag, gaan deurlees. Êrens mis hy ‘n belangrike sinsnede. Die een wat sê dat die mooiste woorde in ‘n vreemde taal asseblief en dankie is.

Om in enige taal die vloek- en kragwoorde te gebruik, maak van vreemdelinge nog nie jou vriende nie. Hulle wonder eerder oor jou.

Ons land en kinders het rolmodelle nodig. Mense vir wie ons ons nie hoef te skaam nie. Mense soos Nelson Mandela wat die hele Suid-Afrika verenig het sonder om enige negatiewe woord te uiter. Hy wat die Springbokke en hul ondersteuners tot die wen van die Web Ellistrofee gemotiveer het deur net hul geliefde groen trui te dra.

Daar is oorgenoeg mense in ons land wat wil moer en bliksem, maar ek dog dit is presies van hulle wat ons ontslae wil raak. Ons is eerder op soek na mense wat bereid is om die ander wang te draai. Suid-Afrikaners wat mekaar se hande wil vat in plaas van hul hande vir mekaar vuis te maak.

Skuus, meneer die Minister! Ek weet rugby is ‘n kontaksport, en volgens Div nie ballet nie, maar ons wil nie alles moer en bliksem nie. Ons het genoeg daarvan gehad. Kyk hoe lyk ons pragtige land van al die gemoer en gebliksem!

For he’s a jolly good fellow … maar ons sê nie almal só nie!

Alle praat in hierdie treurige, bitter, bont, begrafnisland is politiek – of dit nou fluisterpraat, kakpraat, wind- of spoeg- of sáámpraat is. – Breyten Breytenbach

The most terrifying words in the English language is: I’m from the goverment and I’m here to help. – Ronald Reagan

Navigation

Tag Archives | Springbok