Tag Archives | Fetale Alkoholsindroom

One small step …

In watter liggaamsdeel kramp jy as jy oor nasionale TV sê jy wens die pikkewyn in jou tuin by Bettiesbaai kry ‘n virus en vrek? En dit as jy 79 jaar oud is?

Wat maak ’n mens so onvergenoeg en só behep met jouself? Ouderdom? Of sommer net ’n ingatgeit wat geen perke ken nie?

Vir sulke mense wil ek sê: Hou ’n slag op om net vir jouself te leef.  Die wêreld is heelwat groter as jy.

Hou op kla oor alles en almal en hou op om vir jou kleinkinders te vertel van die goeie ou dae. Miskien weet ek nie so baie van die goeie ou dae soos jy nie, maar ek onthou darem party wat maar bra bollie was!

Moenie jou skouertjies optrek en vir my sê niks wat jy doen gaan tog help nie.  Hoe kan die ou klein bietjie wat ek dan nou doen tog ‘n verskil maak? Die oormag is net te groot!

Ek wonder wat moeder Teresa vir die pikkewyne sou gesê het? Beslis nie ek hoop jy vrek nie!

Wat sy wel gesê het, is if you can’t feed a hundred people, then feed just one.

Hou op wag vir die Groot Knal-ingryping wat jou pikkewynprobleem gaan oplos. Doen iets. Span self ’n draad.

Koop ’n roomys en gee dit vir die man, met die baie kinders en geen werk nie, by Willowbridge se kruising.

Glimlag vir die suring langs jou.  Oeps, sorrie … Dis jóú weerkaatsing in die ruit!

Borg ’n kind se kampgeld by Potato Foundation of maak ’n donasie vir fetale alkoholsindroom by die Faith Fund.

Raak ontslae van al die klere wat jy nie dra nie en gee dit vir mense wat dit nodiger het as jy.

Dóén ’n slag net iets. Gee die eerste tree. Al dink jy dis klein.

Miskien gaan jy nie dadelik die verskil sien nie, maar jy gaan beslis beter voel.

 

A bone to the dog is not charity. Charity is the bone shared with the dog, when you are just as hungry as the dog. – Jack London

You can give without loving, but you can never love without giving. – Robert Louis Stevenson

Small deeds done are better than great deeds planned. – Peter Marshall

Continue Reading

Lekker op die plaas!

 

Beyers en die krewe van Vermont

Dit moes darem seker lekker gewees het om op só ’n plaas te kon grootword?

Mense maak baie keer hierdie opmerking as hulle hoor dat ek en Beyers broers is.  Min wetend dat die plaas waarop ons grootgeword het, ’n agterplaas in Kaapstad was!  Bygesê, ’n grote, maar darem nog nie só groot dat ’n mens dit ’n plaas kon noem nie.

Behalwe dat Beyers, vir ’n stadsjapie ’n merkwaardige pad in die Suid-Afrikaanse wynbedryf geloop het, is hy ook ’n besondere mens.  Ek hoor al hoe sê jy dis maklik om so te sê, want hy is jou broer!  Wat kan jy nou eintlik anders sê?

Maar Beyers is nie net ’n wynmaker nie.  En dis ook nie van sy wynmaakvaardighede wat ek wil vertel nie; dit kan jy op ander plekke van gaan lees.  Hy is ook politikus, kerkmens, kosmaker, geselser en ’n mens-mens.  En dit is oor sy  omgee vir mense wat ek wil vertel.

Behalwe vir sy omgee vir elke mens, is dit veral die lot van die mense op Stellenbosch se plase wat hom naby aan die hart lê.  Dit was dan ook om onder andere na hulle belange om te sien dat hy figuurlik gesproke op ’n trekker, met die leuse Stem Trekker en maak die plaaslewe lekker, die plaaslike politiek binnegery het. 

Seer sekerlik een van die uitdagendste probleme wat die wyndistrikte in die gesig staar, is fetale alkoholsindroom.  Baie van die gesinne in die wynland word deur alkoholmisbruik geraak; waarvan fetale alkoholsindroom slegs een aspek is.

Die meeste swanger vroue wat hulle aan alkoholmisbruik skuldig maak, besef nie eens die skade wat hulle aan hul ongebore kind aanrig nie.  Hulle het in die meeste gevalle geen, of die verkeerde, voorligting rakende alkohol en swangerskap ontvang.

Die hartseer van verstandelike vertraging en geboortedefekte as gevolg van fetale alkoholsindroom het by Beyers gespook om iets aan hierdie saak te probeer doen.

Hy stig dan ’n paar jaar terug as ’n nie-winsgewende artikel 21 maatskappy die Beyers Truter Fetale Alkoholsindroom Hulpfonds.  Saam met prominente Suid-Afrikaners soos Chester Williams en Mbhazima Shilowa het hulle net een doel voor oë – om fetale alkoholsindroom vir eens en altyd op sy plek te sit.  Deur middel van die Fonds hoop hy dat hulle genoeg fondse sal genereer om programme te implementeer wat hierdie probleem effektief sal kan aanspreek.

Klik op die Faith-ikoon regs van hierdie blog as jy meer van die Faith Fund wil weet. Of as jy voel jy wil ’n bydrae vir hierdie goeie saak maak.

Pinotage-koning; eerder dienaar.  Nie op ’n troon nie,  maar plat op die aarde tussen sy mense.

Dis my broer, Beyers.

 

A benefit consists not in that which is done or given, but in the intention of the giver or doer. – Seneca

Beyers is a great speaker; like Peter de Villiers, he doesn’t always make sense but he’s fascinating to listen to! – Koos Kombuis

Everybody can be great…because anybody can serve. You don’t have to have a college degree to serve. You don’t have to make your subject and verb agree to serve. You only need a heart full of grace. A soul generated by love.   – Martin Luther King, Jr.  

All you have shall some day be given; 
Therefore give now, that the season of giving
may be yours and not your inheritors. – Kahil Gibran

  

Continue Reading