Braai Paai

 
Hierdie resep gaan net soos die Oranjerivierkool en die Mexican Eggs tydens ‘n kampeerdery vir baie plesier sorg.
 
Of baie braaiers se bas tydens ‘n somervakansie red, want dit is net as mammie en skoonma begin  kla oor al die baie braaivleis wat hulle moet eet, dat jy hierdie een uit die hoed ruk!

Omdat mense mekaar vandag sommer oor ’n ou reseppie in die koerante aanvat, wil ek sommer dadelik almal wat ‘n hand in die uitdink van hierdie paai gehad het, erkenning gee.  Wie die resep eerste uitgedink het weet ek nie, maar ek het dié resep die eerste keer per e-pos ontvang en nou die dag weer gesien dat Braaiboy dit oor die TV maak.  Hierdie weergawe van die Braai Paai is my vriend en boendoekok, Braaitang, se weergawe.

Voor jy egter onverhoeds gevang word en jy dink jy kan sonder voorbereiding dié paai aanpak, wil ek jou net waarsku.  Daar is ‘n paar kardinale ingrediente wat jy gaan nodig hê om hierdie een deur te trek. Die geheim om van ‘n braainul tot braaibul te vorder, is voorbereiding.  Bedink die oomblik wat jy hierdie verrassing wil loslaat en gaan doen dan eers op jou eie  ‘n paar skelm aankope.

NB Noodsaaklik:  ‘n Rooster wat jy op verskillende vasknypvlakke kan stel. ’n Standaardrooster wat nie kan verstel nie, gaan net jou paai in sy maai knyp! Luister mooi wat ek sê.

Jy benodig

Vir 6 – 8 mense

‘n Rooster soos reeds verduidelik

2 x 500g Rolle Skilferkorsdeeg

1 Pak spinasie

3 Gerookte hoenderborsies

1 Pak salami

1 Ui

½ Rooi soetrissie – gekerf na smaak

½ Geel soetrissie – gekerf

1 x 250 Pakkie sampioene

½ Koppie gerasperde Ceddar-kaas

1 Koppie gerasperde Mozzarella-kaas

½ Koppie gekrummelde Feta-kaas

Speserye na smaak. Aanbeveling: Italian Herbs

So maak mens

1. Ontdooi die deeg en rol dit uit.  Gebruik sommer ’n wynbottel as roller.

2. Plaas een helfte van die uitgerolde deeg in die rooster.

3. Braai die ui en rissies saam en geur met speserye soos jy verkies.

4. Pak die laag deeg heel toe met spinasie.  Blink deel van die blaar na buite.

5. Sny nou die hoenderborsies in dun skywe en pak bo-op die spinasie.

6. Plaas ui-en-rissie-mengsel op die hoenderborsies.

7. Maak nou met die salami soos met die hoenderstukkies. Maw salami op die mengsel.

8. Sny die sampioene in skywe en pak op die salami.

9. Strooi die drie kase in lae op die sampioene.

10. Pak die oorblywende spinasie op die kaas. Blink kant na jou.

11. Pak  die tweede rol uitgerolde deeg op die spinasie.

12. Knyp die rante/kante van die deeg toe.

Opsioneel: Klits ‘n eier en verf deeg daarmee om mooi te verbruin.

13. Braai hoog oor kole tot goudbruin. Draai liewers meer as te min. Die deeg kan jou nogal onverhoeds betrap en pikswart verbrand en dan is dit jy en skoonma. Skat so tussen 20 en 30 minute tot gereed vir afhaal.

Sit nou jou geliefkoosde musiek in die CD-speler.  Skink ‘n glasie Beyerskloof en vra vir mammie om nader te skuif. As sy nie reeds teen dié tyd styf teen jou sit nie!

Hier is ‘n klompie prentjies dat jy kan sien waarvan ek praat (foto’s:Anita Steenkamp en self):

 
 

Pak die 1e laag spinasie

Braai die soetrissie en ui

Pak salami

Amper klaar! Strooi die kaas

 

'n Meneer van 'n paai!

(Visited 740 times, 1 visits today)

,

4 Responses to Braai Paai

  1. Leon November, Thursday 17 2011 at 7:50 am #

    Ongelooflik…flippen…lekker

  2. anita November, Thursday 17 2011 at 9:33 am #

    Rian, helo jong hoop nie jy gee om nie, maar hierdie resep van ou braaitang gaan ek “as is” aanstuur vir ‘n paar van my entoesiastiese braai vrinne. Dis te lekker om geheim te hou!!!!

  3. Zee October, Saturday 21 2017 at 9:29 pm #

    absoluut awesome wil hoor of ek die resep en foto mag deel op Lekker braai rsa asb

    • Rian Truter December, Monday 4 2017 at 11:32 am #

      Beslis. Sorrie ek antwoord so laat

Leave a Reply