Ver in die Ou Kalahari

By Rian Truter on June, Monday 13 2011 in 2011, Life, Reis 2

Kalahari-rooi

Was jy al in die Kalahari?

Nog nie?

Pak dan onmiddellik jou kar en kry jou ry, want van uitstel, weet jy, kom afstel.

Stel nie belang nie, hoor ek jou sê. Dan sit ek jou dadelik op my gebedslys, want jy weet duidelik nie waarvan jy praat nie.

’n Groepie van ons het ’n paar weke terug in Namibië gaan jag. En ook na die hart van die Kalahari gaan soek.

Gaan soek na daar waar hy begin. Waar hy van sy ma af loskom en op eie bene staan.

En ons het dit gekry. Net so anderkant Koës. Daar begin die hart van die Kalahari.

Dit is daar waar die rooi duine soos golwe oor die see mekaar in ’n amper eentonige reëlmaat opvolg. Dit is daar waar die versamelvoëlneste die kameeldoringboom se takke laat afbreek, want te veel plakkers het kom intrek.

Dit is daar waar jou naaste buurman 20 kilometer van jou bly.

Die hart van die Kalahari lê vasgevang in oë van sy spring- en gemsbokke wat vroegoggend die son se strale teen die duin weerkaats. Jy voel sy hart klop as jy in die strate tussen die duine jou bakkie in die tweespoorpad probeer hou.

Maar dit is eers as dit donker word dat die Kalahari die binnekant van sy hart vir jou wys. Dit is dan wanneer jy in ’n grootse skepping kan opkyk en weet dis genade. Genade dat jy weer die hart van die Kalahari kon hoor klop, want jy is net nog ’n skepsel in hierdie wonderlike Skepping.